WhakamĀrama Āpitihanga
Ko te tohe matua a te hunga e whai ana i te huatika āhuarangi, nā ngā whenua whairawa o te ao i ara ake ai te āhuarangi hurihuri, nō reira mā rātou anō e pīkau ngā mahi nui hei whakapōturi i te mahana haere o te ao. Ko ētahi o ngā mahi e whakatenatenatia ana:
- Ko te whakaiti i te whakapetonga kia kaua e pērā rawa te whakapau i ngā rawa o Papatūānuku, mā reira e iti ake ai te tuku i ngā haurehu kino ki te kōhauhau, me te ākiri anō i te para.
- Ko te whakaiti, te whakakore rānei i te tahuna o te koranehe i roto i ngā wheketere, i ngā waka me ngā punahiko, kia tahuri ai ki te whakamahi i te pūngao whakahou.
- Ko te whakaiti i te moumou kai. Mā reira e iti ai te para kai e tukuna atu ana ki te ruapara. Mā reira hoki e nui ake ai ngā kai e wātea ana hei tuari ki te hunga rawakore.
- Ko te whakakore i te whakarakenga whenua, me te tahuri ki te whakatipu rākau ki te whakanehenehe anō i te whenua. Ko tā te wao, he miti i te hauhā e tukuna ana ki te kōhauhau, e whakararu ana i te āhuarangi. Koia rā tētahi mahi e tukuwaro-kore ai tētahi whenua ā tōna wā, e tukuwaro-iti ai rānei.
- Ko te tahuri ki te tūāhanga kāriki i roto i ō tātou tāone nui, pērā i te rokiroki i te wai ua hei whakamahi i roto i te kāinga.
I ētahi whenua, kua whakatauria he tāke waro hei utu mā te hunga e tuku hauhā ana ki te kōhauhau, pērā i te hunga taraiwa waka, i ngā umanga kawekawe, i ngā kaipāmu. Ko te whāinga o tēnei momo tāke kia whakaitia te whakamahinga o te koranehe me te tukuna o te hauhā.
E tino kitea ana te kaikiri taiao i ētahi porihanga, i ētahi whenua, inā te whakatū taupuni para tāoke ki ngā wāhi e nohongia ana e tētahi iwi taketake, e tētahi hapori pakukore rānei. E kore rawa ērā e whakatūria ki te wāhi e nohongia ana e te hunga whairawa. Hei tauira: