WhakamĀrama Āpitihanga
Ka tuhia te tere o tētahi mea hei pāpātanga. Hei tauira, ko te tere o te motukā e whakaaehia ana e te ture ki roto i te tāone, ko te 50km/h.
Ki te tuhia he kauwhata hei whakaatu i te tawhiti o tētahi haere i te takanga o te wā (kauwhata tawhiti-wā), ko te rōnaki o te kauwhata hei tohu i te tere o te haere:
- Mēnā he rārangi huapae te kauwhata, kāore te mea e nuku ana (kāore e oti he tawhiti i te takanga o te wā):
- Mēnā he pūmau te rōnaki o te rārangi, e pūmau ana te tere (tere pūmau). Mēnā he poupou te rārangi he tere te haere, mēnā he māmā te rōnaki, kāore i te pērā rawa te tere:
- Mēnā he ānau whakapiki te kauwhata, e piki ana te tere o te haere, arā, e whakahohoro ana:
Ko te ine-tere o tētahi motukā hei tohu i te tere inamata o taua motukā, arā, te tere o te motukā i taua wā tonu. Ko te 40km/h te tere e whakaaturia ana i te ine-tere nei. Ko te 40km te tawhiti ka oti mēnā ka pūmau te tere mō te roanga atu o tētahi haora:
I te roanga atu o te haere o tētahi motukā, kāore e pūmau te tere - he wā ka piki ake, he wā anō ka heke iho. E tātaihia ai te tere toharite o tētahi mea, me whakawehe te tawhiti o te haere ki te wā e oti ai taua tawhiti. Arā te whārite: t = T/w (t = tere, T = tawhiti, w = wā)
Mēnā ka oti te 80km i te haora kotahi, ka kīia ko te 80km/h te tere toharite, ahakoa te piki me te heke o te tere i te roanga atu o taua haora.