WhakamĀrama Āpitihanga
Koia nei ētahi take ka pupū ake tēnei mea te taututetute ki waenganui i ētahi tāngata, rōpū rānei:
Ina tino pupū ake te taututetute he whawhai pea te otinga atu. He whawhai ōkiko nei, he whawhai tao kupu rānei, pēnei i te whakairi kōrero hahani ki runga pae pāhopori.
Ko te mahi whakatatū taututetute he tukanga ka whāia kia kore ai e pērā rawa te tutūnga o te puehu, arā, kia hohoungia te rongo ki waenga i ngā taha e rua e taututetute ana. Mēnā he karioi te hohounga o te rongo, ka kīia tērā ko te tatau pounamu, ko te rongo taketake rānei.
Arā ētahi atu momo taututetute:
- Ko te whakaaro taupatupatu, arā, ko te ātete o tētahi whakaaro i tētahi. Hei tauira ko te whakatau ture a te kāwanatanga kia haumaru ai te tākaro a te tamariki, me te tuku i ngā tamariki mā rātou anō e whakatau te haumaru i roto i ā rātou tākaro.
- Ko te whakapono taupatupatu. Koia ko te ātete o tētahi whakapono i tētahi, pērā i te whakapono Māori me te whakapono Karaitiana mō te orokohanga mai o tātou te tangata.
- Ko te uara taupatupatu, pērā i te ātete o te whakataetae a tētahi ki tētahi e ora ai te kiritahi, me te mahi ngātahi a te tokomaha e ora ai te hapori.
- Ko te hirikapo taupatupatu, arā, ko te tautohetohe o roto i te hinengaro o te tangata ka hua ake i ētahi whakaaro tauaro e rua, nui ake rānei. He wā anō ka hua ake te hirikapo taupatupatu i te kore o tētahi akoranga hou i noho tau ki te taha o mātauranga kē atu kua mau kē ki te hinengaro.