WhakamĀrama Āpitihanga
He maha ngā taurangi o tētahi whakamātau. Hei tauira, mēnā e tukuna ana tētahi waka ki runga i tētahi rōnaki kia kitea ai te tawhiti o te haere, koia nei ētahi o ngā taurangi:
- te taumaha o te waka
- te poupou o te rōnaki
- te āhua o te papa o te rōnaki (mēnā he pāhekeheke, he taratara rānei)
- te rahi o ngā wīra o te waka
- te maha o ngā wīra o te waka
- te tawhiti o te haere o te waka inā tukuna
- te wāhi i te rōnaki i tukuna ai te waka.
I roto i tētahi whakamātau ka noho pūmau ētahi o ngā taurangi, kāore e whakarerekēngia nā te mea kāore e tūhurangia ana te whai pānga o aua taurangi. Ka kīia he taurangi whakatina.
Mēnā ka rerekē tētahi taurangi nā te whakarerekē i tētahi atu, ka kīia he taurangi whakamauru tērā. Ko te taurangi i whakarerekēngia, ka kīia he taurangi rāwekeweke. Hei tauira, mēnā ka tukuna te waka e whakaaturia ana i runga nei, ā, kāore e whakarerekēngia te rahi me te maha o ngā wīra, te āhua o te papa o te rōnaki, me te taumaha o te waka, koia ērā ko ngā taurangi whakatina. Ka whakarerekēngia te poupou o te rōnaki kia kitea ai te tawhiti o te haere o te waka. Ko te poupou o te rōnaki te taurangi rāwekeweke. Ko te tawhiti o te haere o te waka te taurangi whakamauru.