taiao ako

learning environment

WHAKAMĀRAMA

Ko ngā āhuatanga katoa o te wāhi e haere ana te mahi ako, tae atu ki te taha ōkiko, te taha wairua, te taha whakawhanaunga, te taha kare ā-roto hoki.

All aspects relating to the place in which learning happens, including physical, spiritual, social and emotional aspects.

Tauira KŌrero

Ka rawe te taiao ako o konei e hoa, e noho huānga ana ngā ākonga, e mauri tau ana.

Ki te kore e pai te taiao ako, kāore e tino tōia te ākonga ki roto i āna mahi ako.

Kua tahuri te kura ki te whakapaipai i ngā taiao ako, me kore e ngākaunui ake ai ngā ākonga ki ā rātou mahi.

WhakamĀrama Āpitihanga

Arā te kōrerohia o te taiao ako hou. Koia ko te āta whakarite i te akomanga me ōna hanga, e taea ai te mahi ā-rōpū a ngā ākonga, te mahi takitahi, tae atu ki te whakamahi i ngā momo hangarau matihiko, pērā i te rorohiko, i te papa atamai me te pūrere rongo. He akomanga nui te nuinga o ngā taiao ako hou, koia hei wāhi ako mō te 50 ākonga, neke atu. Ākene pea he kopa mahiwehe i te taha, he taiwhanga iti hei mahi mā te ākonga takitahi, mā te rōpū rānei.

I tua atu i te āhua ōkiko o te taiao ako, ko te ahurea o te akomanga me te wairua o te akomanga ka whakatauria e te pouako:

Ko te ahurea o te akomanga, koia ko ngā tikanga ka āta whāia e noho huānga ai te ākonga, e pai ai te piringa o te pouako me āna ākonga, te piringa hoki ki waenganui i ngā ākonga, e pai ai hoki te kiritau o te ākonga. Hei tauira, ko tōna manawanui ina hapa tētahi mahi āna, ko tana ngākaunui ki te tono āwhina ina hiahiatia.
Ko te wairua o te akomanga, koia ko ngā rongo o te puku i ngā piropiro, i ngā waiaro, i te hā me te mauri tau o te taiao ako. Me he wairua whakakino, ka rangona pea te taraweti, te pukuriri me te aroha kore o tētahi ki tētahi. Me he wairua whakapai ka rangona te marutau, te whakaute a tētahi ki tētahi me te hihiko o ngā ākonga ki ā rātou mahi.

Ka rawe te taiao ako o konei e hoa, e noho huānga ana ngā ākonga, e mauri tau ana.

Ki te kore e pai te taiao ako, kāore e tino tōia te ākonga ki roto i āna mahi ako.

Kua tahuri te kura ki te whakapaipai i ngā taiao ako, me kore e ngākaunui ake ai ngā ākonga ki ā rātou mahi.