tāhū

WhakamĀrama Āpitihanga

Mēnā e whai ana tētahi mahi i tētahi i roto i te paki, ka kīia tērā he tāhū raupapa. I te tāhū whakahipahipa, kāore ngā mahi e noho raupapa ana.

Koia nei ētahi o ngā āhuatanga ka whai wāhi atu ki te tāhū:

• Ko te whakatakinga. Koia nei te tīmatanga o te paki. I tēnei wāhanga ka tūtaki atu ki ngā kiripuaki matua, ka huraina te kaupapa o te paki.
• Ko te tutūnga o te puehu, arā pea he taututetute, he raruraru ka pā ki waenga i ētahi o ngā kiripuaki, he mōrearea rānei ka hua ake. I tēnei wāhanga ka piki haere te poho tārewa me te manawapā o te hunga mātakitaki, o te hunga pānui.
• Ko te karamata, arā, te tino pahūtanga, te huringa pea o te kiripuaki matua ki te whai i ara kē. He āhuatanga ohorere pea ka puta i tēnei wāhanga o te paki, ka kīia ko te whakaohorere. He āhuatanga tuhi tēnei hei whakapiki i te hiahia o te kaipānui kia pānui tonu ia i te paki.
• Ko te taihuringa, arā, ko muri mai i te karamata. Ko te wāhanga o te paki e kaha ana te manawapā, ā, ka tīmata ngā mahi e tau ai te puehu ā tōna wā.
• Ko te tatūnga. Ko te hekenga tēnei ki te mutunga o te paki. I tēnei wāhanga ka whakatauria te raruraru, ka mauru haere te manawapā.
• Ko te whakakapinga, arā, te mutunga o te paki.
• Ko te tāhū iti, arā, he mahi kē atu e haere ana i te paki engari he iti ake i te tāhū matua. Ākene pea he rerekē ngā kiripuaki e kawe ana i te tāhu iti i ērā e kawe ana i te tāhū matua. Mēnā he tauaro, he ātete te tāhu iti i te tāhū matua, ka kīia tērā he tāhū taupatupatu.