WhakamĀrama Āpitihanga
Kei roto te pokapū roto i te kirinuku, koirā te wāhi ka takea mai ai te rū. Kei te mata o te whenua te pokapū waho kei runga ake i te pokapū roto:
He kaimātai pūtaiao nō Amerika a Charles Richter. Nāna i waihanga tētahi āwhata hei ine i te kaha o tētahi rū. Ka tīmata te āwhata i te 1, he rū māmā noa iho tēnā. Ko te 10 te whakamutunga o te āwhata, he parekura kino rawa atu. Ko tā te āwhata he whakaatu i te kaha o te nuku o te whenua i tētahi rū. I eke te kaha o te rū whenua i Ahuriri i te tau 1931 ki te 7.8 i te āwhata Richter.
Arā anō tētahi āwhata hei ine i te kahapā o te rū. Ko tā te āwhata whakahou a Mercalli he ine i te nui o te pānga mai o te rū ki a tātou te tangata me te taiao. Ka tīmata i te 1, he māmā noa iho te pā mai o te rū, ākene pea ka paku pīoioi noa iho tētahi mea e tāwēwē ana. Ko te 12 te whakamutunga o te āwhata. Ka turakina ngā whare katoa, ka āta kitea hoki e te karu tangata ngā ngaru o te rū. Ko te rū whenua i Ahuriri i te tau 1931, i eke ki te 11 i te āwhata whakahou a Mercalli.
I ētahi wā, ka hua ake he rūpaku i mua, i muri rānei i te rū matua. Ka kīia ēnei ko te rūmua me te rūmuri.