WhakamĀrama Āpitihanga
Hei tauira o ētahi aronga ako whaihua:
- Ko te pākiki, arā, ko te hiamōhio o te ākonga ki ngā āhuatanga e kitea ana, e rangona ana.
- Ko te tū motuhake o te ākonga, arā, ko tōna āhei ki te whai i āna mahi ako me te kore e āwhinatia e te pouako i ngā wā katoa. Ka riro mā te ākonga e tono āwhina ina hiahiatia. Ka kīia tērā ko te ako tūhake.
- Ko te auahatanga, arā, ko te tuku a te ākonga i tōna hinengaro kia rere, ko tana kōtuitui i ōna whakaaro, i ōna pūmanawa, me ōna pūkenga ki te waihanga i tētahi mea hou.
- Ko te manawaroa, arā, ko tā te ākonga aro ki ngā panonitanga me ngā wero o te wā i runga i te ngākaupai, i te māia, i te titikaha me te whakapono ka eke ia ki runga ake i aua panonitanga me aua wero.
- Ko te pāuaua, arā, ko te kaha me te hihiko o te ākonga ki te whai i tētahi mahi ako.
- Ko te manawa kai tūraru. Koia ko tā te ākonga whai tonu i tētahi mahi ako hou ahakoa te tūpono hapa, te tūpono rānei ka kore e puta he hua. Ka whakapono ki a ia anō, kāore ia e mataku.
Ko te whirinaki tuhene tētahi tauira o te aronga ako takarepa, arā, ka tatari noa iho te ākonga ki ngā tohutohu a te pouako, kātahi ia ka nekeneke. He kakama-kore ia.
Ko te aronga ako o te tangata hei tauira o tēnei mea te aronga hinengaro, arā, ko te āhua o ngā whakaaro o te tangata ki a ia anō, me āna mahi. Ko te aronga hinengaro tētahi āhuatanga matua e eke ai te ākonga i ngā taumata o angitu. He whakataukī tēnei e tohu ana i te hiringa, i te manawaroa, i te pāuaua o te tangata. Koia tētahi aronga hinengaro tōrunga: Kaua mā te waewae tutuki, engari mā te upoko pakaru.
Arā te kōrerohia o te aronga hinengaro whakauka me te aronga hinengaro whakatipu: