pūkete

WhakamĀrama Āpitihanga

He maha ngā rohe o roto i tētahi whatunga rorohiko, ā, he rerekē te pūkete uru ki tēnā rohe ki tēnā rohe. Ka kīia tērā ko te rohe pūkete. Mēnā e taea ana e tētahi kaiwhakamahi te uru atu ki tētahi rohe, ka kite ia i ngā kōpaki me ngā kōnae e wātea ana ki ngā kaiwhakamahi katoa e whai mana ana ki te uru ki taua rohe.

He rorohiko tūmau kei te pokapū o te whatunga, ka kīia tērā he pūmana rohe. Ko tāna he huaki i ngā kūaha ki ngā rohe i runga i ngā whakaaetanga uru o te
pūkete kaiwhakamahi. Mā konei e haumaru ai ngā kōnae me ngā kōpaki e noho ana ki te whatunga rorohiko.

Ko te mahi a te kaiwhakahaere whatunga, he tautuhi i ngā whakaaetanga e tika ana mō tēnā rorohiko, mō tēnā rorohiko o roto i te whatunga. Ko ētahi o ngā momo
whakaaetanga:

• Ko te whakaaetanga tukupū, arā, ko te mana ki ngā kōnae me ngā mahi katoa o te whatunga.
• Ko te whakaaetanga whārere i ngā papatono, i ngā kōnae o roto i tētahi tātai.
• Ko te whakaaetanga pānui, arā, e whai mana ana ki te pānui i ngā kōrero o roto i tētahi kōnae, koia anake, kāore e whai mana ana ki te raweke, ki te tuhi, ki te takatā. Ka kīia, ko te 'aratau pānui-anake'.
• Ko te whakaaetanga tuhi, arā, e whai mana ana ki te tuhi, ki te takatā i tētahi kōnae.

I ētahi whatunga, pūnaha, pūrere, papatono rānei, mā te nama tautohu whaiaro (PIN) e uru ai. He raupapatanga pū-nama tēnei ka whakamahia whānuitia hei whakaaetanga uru mā te tangata ki āna pūtea pēke. I ētahi wā, ka tāpiria hoki he pātai muna hei whakautu mā te tangata e uru atu ana ki te pūkete, kia haumaru ake ai. Mā te tangata nāna tonu te pūkete ēnei pātai e whakatau i te wā e whakatūria ana te pūkete. He pātai ēnei tē tāea e te mūrere te whakautu. Ka kīia tēnei he motuhēhēnga tukarua. Hei tauira o ētahi pātai muna:

• Ko wai te ingoa whānau o tō whaea?
• Ko wai te ingoa o tō mōkai tuatahi?
• I whānau mai koe i hea?