WhakamĀrama Āpitihanga
Ko te momo pū whakaahua e tino whakamahia ana i ēnei rā, ko te pū whakaahua matihiko. He arotahi tō te pū whakaahua matihiko hei kawe i te aho ki roto i te pū whakaahua, kia hopukina e te paerongo matihiko. Ka puritia te whakaahua ki te kōnae matihiko mōkito kei roto i te pū whakaahua, arā, te kāri mahara. Kei te nuinga o ngā waea pūkoro he pū whakaahua. He pū whakaahua matihiko ēnei:
Mā te kaihopu whakaahua e whiriwhiri mēnā māna tonu e tohu te huranga, arā, te roa e huaki ana te kōpani kia uru ai te aho, mā te pū whakaahua rānei e tohu. Koia te whiriwhiringa 'ā-ringa', 'aunoa' rānei. Mēnā he roa te huranga, he rahi te aho ka uru atu ki te pū whakaahua, ā, ka tea ake te whakaahua ka puta. Ki te roa rawa e huraina ana, ko te huranga tuhene tērā. Mēnā he poto te huranga, he iti te aho ka uru atu ki te pū whakaahua, ā, ka pōuriuri ake te whakaahua ka puta. Ki te poto rawa, ka kīia tērā ko te
huranga pore:
He momo atu anō te pū whakaahua kiriata, ko tāna, he pupuri i te whakaahua ki te kiriata. Ka tangohia te kiriata i roto i tētahi taiwhanga pōuriuri, ā, ka whāia he tukanga matū hei whakaputa i te whakaahua tōraro ki te kiriata, kātahi ka tāngia ki te pepa whakaahua mā tētahi atu tukanga matū. He pū whakaahua kiriata tēnei:
Karekau he arotahi o te pū whakaahua puare ririki. He pouaka noa iho, he puare ririki kei tētahi mata, ā, ka whakamaua he pepa whakaahua ki te mata roto e noho tauaro ana. Ka uru atu te aho mā roto i te puare ririki, ā, ka hopukina ki te pepa whakaahua.
Ko tā ētahi pū whakaahua, he hopu i te whakaahua tū, karekau he nekeneke. He momo pū whakaahua kē hei hopu i ngā whakaahua ataata, e kitea ai ngā nekeneke i te takanga o te wā. Hei tauira o te pū whakaahua ataata:
