WhakamĀrama Āpitihanga
E whai īhi ana te nuinga o ngā momo parāoa, koirā e rēwenatia ai. Ka whakaranua ngā kai whakauru, ka pokepokea kia uru mai ai te hau, kia āhua kūtorotoro anō hoki. Ka waiho ki tētahi wāhi mahana, nāwai ā ka piki. Kātahi ka tunua ki rō umu. Ko te īhi me te pēkena paura ngā matū rēwena ka mātua whakamahia ki te tunu parāoa.
Ko te raranu parāoa, koia ko te ranunga o te maramara parāoa, te riki, te hēki me te namunamuā, pērā i te amiami. I te nuinga o te wā ka purua ki roto i tētahi atu momo kai, pērā i te pīkaokao, ā, ka taongia ki rō umu, ki roto rānei i te hāngi.
Koia nei ētahi momo parāoa:
| kiapata | He momo nō Itāria, ka mahia ki te puehu parāoa wīti. |  |
| naana | He momo parāoa pararahi nō Inia me ngā whenua o Te Rāwhiti Waenga. Ka rēwenatia ki te īhi, ko te miraka, te hēki, te huka me te tote ētahi atu o ngā whakaurunga. |  |
| parāoa kape | He momo nō Ateria, nō Wīwī anō hoki, he pēhi aparau, ka rēwenatia ki te īhi. He kape tōna hanga. |  |
| parāoa kurutene-kore | Ka mahia ki tētahi pūehu parāoa kurutene-kore pērā i te puehu parāoa āmanati. |  |
| parāoa moī | Karekau he whakaurunga kē atu i te puehu parāoa, te wai me te tote. |  |
| parāoa parai | He momo ka mahia ki te puehu parāoa, te īhi, te huka, ka whakaranua ki te wai me te miraka, ā, ka tahuna rumakitia ki rō hinu. |  |
| parāoa patarau | Ka mahia ki te puehu parāoa mā, me te rau anō i ngā pata maha ki roto. |  |
| parāoa pata tikitū | Ka mahia ki te puehu parāoa tikitū, me te rau anō i ngā pata tikitū maha. |  |
| pita | He momo parāoa pararahi, ka mahia ki te puehu parāoa wīti me te īhi. |  |
| rēwena, parāoa rēwena | Ka mahia ki te īhi rīwai, te puehu parāoa me te huka. |  |
| takakau | Karekau he īhi i tēnei momo. Ka kīia he parāoa rēwena-kore. |  |