WhakamĀrama Āpitihanga
He pāpono raupapa ētahi whakamātau tūponotanga. Arā, ka whai tētahi mahi i tētahi. Hei tauira, ko te piu i te uka me te pīrori i te mataono tau. Mā te tuhi hoahoa rākau e kitea ai ngā putanga katoa e taea ana:
Ka kīia ētahi pāpono he pāpono aukati nā te mea ka aukati te putanga o tētahi pāpono i te putanga o tētahi. Hei tauira:
Ina tangohia tētahi kāri pango i te pūkei kāri, ka aukati tērā i te putanga o tētahi kāri whero. Ka kīia he pāpono aukati te tango i te kāri pango me te tango kāri whero. He huinga ritua te huinga ‘kāri whero’ me te huinga ‘kāri pango’:
Ehara te tango kāri pango me te tango i tētahi kīngi i te pāpono aukati. E rua ngā putanga e taea ana e tutuki ai ēnei pāpono e rua, arā, ko te kīngi kaheru me te kīngi karapu – e rua he pango, e rua he kīngi. He huinga tūhono te huinga ‘kāri pango’ me te huinga ‘kīngi’:
Mēnā he pāpono wehe kē ētahi pāpono e rua, kāore he pānga o tētahi ki tētahi. Hei tauira: Ko te tango matapōkere i ētahi kāri whero e rua i tētahi pūkei kāri. Ko te 26/52 ( 1/2 ) te tūponotanga o te kāri whero tuatahi. Mēnā ka whakahokia taua kāri ki te pūkei, ko te 26/52 ( 1/2 ) anō te tūponotanga he whero te kāri tuarua. Kāore he pānga o tētahi pāpono ki tētahi, ka kīia he pāpono wehe kē. Arā, he putanga wehe kē tō tēnā tangohanga kāri tō tēnā.
Ki te kore e whakahokia te kāri tuatahi, ko te 26/51 te tūponotanga he whero te kari tuarua (mēnā he pango te kāri tuatahi), ko te 25/51 rānei (mēnā he whero te kāri tuatahi). E whakawhirinaki ana te tūponotanga o te pāpono tuarua ki te pāpono tuatahi. He tauira tēnei o te tūponotanga whakawhirinaki, ā, ka kīia he pāpono whakawhirinaki. He putanga whakawhirinaki te putanga o te tangohanga kāri tuarua.