WhakamĀrama Āpitihanga
Koia nei ētahi pāpātanga e kōrerohia whānuihia ana:
- Ko te pāpātanga tangata. Arā, ko ngā hua ka puta ki te taiao nā runga i te mahi a te tangata. I ētahi wā, ka kīia ēnei he pāpātanga taiao. Hei tauira, ko te mahana haere o te ao me te parahanga ka puta i te tahuna o te koranehe; ko te whakarake whenua hei mahi pāmu, hei hanga tāone rānei; ko te whakakoraha whenua ka hua ake i te hē o te mahi ahuwhenua, i te tauraki, i te whakarake rānei. Ko te whakapoke i te taiao tētahi pāpātanga tangata e kitea nuitia ana huri i te ao:
- Ko te pāpātanga ohaoha. Koia ko te pāpātanga o tētahi mahi, o tētahi tukanga, o tētahi kaupapahere, o tētahi kaupapa rānei ki ngā āhuatanga ohaoha o te tangata, o te rōpū rānei, pērā i te whānau, i te iwi, i te hapori, i te whenua, me te ao whānui.
- Ko te pāpātanga pāpori. Koia ko te pāpātanga o tētahi mahi, o tētahi tukanga, o tētahi kaupapa rānei ki te oranga o te hapori. Arā te pāpātanga pāpori kino o ētahi mea, pērā i te hokotanga atu o te whakapōauau. Arā hoki te pāpātanga pāpori pai, pērā i tā te marae whakarato kai ki ngā whānau tuakoka o te hapori.
- Ko te pāpātanga ahurea. Koia ko te pāpātanga o tētahi mahi, o tētahi tukanga, o tētahi kaupapa rānei ki te ahurea o tētahi iwi. Hei tauira, mēnā e mate ana te mauri o te awa nā te parahanga tangata, ka mate anō ko te mauri o te iwi nō rātou taua awa. He pāpātanga taiao te mauri mate o te awa. He pāpātanga ahurea te mauri mate o te iwi.