WhakamĀrama Āpitihanga
He maha ngā whakamahinga o te kupu nei, te panoni, i roto i te tikanga ā-iwi. Koia nei ētahi:
Ko te panoni pāpori. Koia ko te whakarerekē, te rerekē haere rānei o ngā āhuatanga pāpori, pērā i te anga pāpori, ngā whanonga pāpori me ngā ritenga pāpori.
Ko te panoni tōrangapū. Hei tauira ko te panoni i te pūnaha pōti, ko te panoni i te tukanga whakatū i tētahi ture hou.
Ko te panoni hangapori. Ko ētahi tauira i Aotearoa, ko te pakeke haere o te taupori haere ake nei, ko te tipu o te ōrau Māori o te taupori me te heke o te ōrau Pākehā.
Ko te panoni ohaoha. Hei tauira, ko te aranga ake o ētahi umanga hou me te heke o ētahi. Ko te umanga matihiko, ko te umanga kiriata hei tauira o ētahi umanga kua tino tipu i Aotearoa i ngā tau tata nei. Kua heke te umanga tui kākahu, ā, i tino heke te umanga tāpoi i muri i te horapa o te mate Korona i te tau 2020.
Ko te tutūnga o te puehu i runga i te pakanga a tētahi rōpū kia panonihia tētahi āhuatanga o te porihanga, ka kīia ko te pāhoro. Ka pupū ake te pāhoro i te kaikiri me te whakahāwea a te iwi awenui ki te tokoiti, i ngā ture me ngā tikanga tōkeke-kore anō hoki.
Mēnā ka āta whakamaheretia he panonitanga kia pai ake ai, kia tōkeke ake ai tētahi whakahaere, tētahi rāngai tūmatanui, tētahi umanga rānei, ka kīia tērā ko te panoni whakaumu.
Ko te auroatanga te tauaro o te panoni, arā, ka mau tonu tētahi āhuatanga, kāore e panoni i roto i te takanga o te wā. Hei tauira, ko te auroatanga pāpori, koia ko te tuku ihotanga o ngā tikanga, ko te mau tonu ki ngā whanonga, ki ngā uara o roto i te porihanga, o roto rānei i tētahi ahurea.