WhakamĀrama Āpitihanga
Ka kīia ngā paetukutuku pāhopori he whatunga pāpori, inā ka tuia te hunga ka whai wāhi atu ki taua pae hei hapori tuihono e whakawhitiwhiti whakaaro ana, e whakawhitiwhiti kōrero ana i waenganui i a rātou anō.
Ko ngā tāngata ka whakaaehia e koe kia whai wāhi atu ki tāu ake pae pāhopori, ka kīia he hoa. E taea ana ō hoa te whakarōpū ki ētahi kāhui hoa, ākene pea he rerekē ngā kaupapa me te āhua o ngā whakawhitinga kōrero ki tēnā kāhui hoa, ki tēnā kāhui hoa.
Ko te mahi hei aukati i te whai wāhi tonu o tētahi hoa ki tō pae pāhopori, ka kīia ko te wetehoa.
Ko ētahi pae pāhopori e mōhio whānuitia ana:
Ko Pukamata: He pae ipurangi hei whakawhitiwhiti kōrero mā ngāi Pukamata, hei tuku whakaahua, ataata, hononga rānei ki pae ipurangi kē. He utukore a Pukamata.
Ko Tīhau: He ratonga ipurangi hei tuku rangitaki poto mā ōna tāngata, hei pānui rānei i ngā rangitaki poto a tangata kē. Kāore i nui atu i te 280 ngā pūtohu o tētahi tīhau. He utukore a Tīhau. Ko te tīhau anō i te rangitaki a tētahi atu, tētahi mahi e horapa whānui ai taua rangitaki.
Ko Paeāhua: He ratonga ipurangi hei tuku whakaahua mā ōna tāngata, hei tirotiro i ngā whakaahua ka tukuna e tangata kē. He utukore a Paeāhua.
Ko Atapaki: He taupānga tēnei hei tuku whakaahua me tētahi kōrero poto (mā te pātuhi) ki tangata kē. He rangitahi te Atapaki, arā, he wā poto hei tirotiro, kātahi ka ngaro.
