WhakamĀrama Āpitihanga
Ko ngā wāhanga o roto i ngā paheko tau e whā:
Ina puta he otinga ki tētahi rapanga pāngarau, ki tētahi tūhuratanga rānei, koia nei ētahi āhuatanga hei āta whakaaroaro:
- Ko te tōtika o te otinga. Koia te pātata o te otinga i inea, i tātaihia rānei ki te otinga tika pū. Hei tauira, ka inea te tāroaroa o te tangata ki te mitarau (cm) e pātata ana, nō reira kāore te tāroaroa tika pū e tau ki tua atu i te haurua mitarau (0.5cm) ki runga ake, ki raro iho rānei i taua inenga. Ka kīia ko te ±0.5cm ngā tepe o te tōtika.
- Ko te houtupu o te otinga. E pā ana tēnei ki te arorau o tētahi tukanga, ki te pai o tētahi taputapu rānei hei ine, hei tūhura i tētahi mea. E whirinaki ana te houtupu o ngā raraunga ka puta i tētahi tūhuratanga tauanga ki te tika o te tukanga i whāia hei kohikohi i aua raraunga. Mēnā kāore e houtupu ana te otinga, ka kīia he houtupu-kore, he koremana rānei.
- Ko te horopū o te otinga. Mēnā ka tukuruatia, ka toaitia te inenga, te tātaitanga, te tūhuratanga rānei, ā, ka rite tonu te otinga ka puta, ka kīia he otinga horopū tērā. Me he manei ngā otinga ka kīia he horopū-kore, he hārakiraki rānei.
- Ko te tika o te otinga. Ka āta tirotirohia mēnā e whaitake ana, kāore i hē, i hapa rānei ngā tātaitanga. Ko te otinga hē te tauaro o te otinga tika.