WhakamĀrama Āpitihanga
Kei ia whenua tāna ake pūnaha moni. Ka kīia ngā moniuka me ngā monirau o te pūnaha, he moni pūkoro hei kawe mā te tangata i tana pāhi, i tana pūkoro rānei hei hoko māna i ngā mea o ia rā e hiahiatia ana. E mimiti haere ana te whakamahinga o te moni pūkoro i ēnei rā, e whakakapia ana ki te kāri utuhiko me te kāri taurewa. Koia nei ngā moniuka me ngā monirau o Aotearoa:
Ko tā te pāpātanga whakawhiti, he whakaatu i te hononga o te pūnaha moni a tētahi whenua ki te pūnaha moni a whenua kē atu. Ka piki, ka heke te pāpātanga whakawhiti i runga anō i ngā āhuatanga ohaoha o te wā. Hei tauira, i te 18 o Whiringa ā-rangi 2020, ko te 0.944102 te pāpātanga whakawhiti i te tāra Aotearoa hei tāra Ahitereiria. Arā, he rite te $1 Aotearoa ki te $0.944102 Ahitereiria.
I ngā tau o mua tata nei, i ara ake te kurutete tāhiko hei utu mā te tangata i ana hokonga. Arā, ko te kāri utuhiko me te kāri taurewa, ka whakaurua ki roto, ka miria, ka tukua rānei kia whakaparo ki mua i te pūrere tāhiko i te wāhi hoko (ka kīia he utu whakaparo). Ka mau ā-matihiko i te pēke ngā monikuhu ka whakaurua ki roto i te pūtea e hāngai ana ki te kāri, me ngā whakapaunga ka tangohia ake.