moe

WhakamĀrama Āpitihanga

He mea nui kia au, kia rite tonu te moe a te tangata, e haumanutia ai te tinana me ōna tukanga ora. Ehara i te mea he pūmau te āhua o te moe, ka huri haere, ka huri haere i te roanga atu o te wā e moe ana te tangata. E toru, e whā pea ngā huringa moe o te tangata i ia pō, ā, e whā ngā wāhanga o roto i ia huringa moe. He rerekē te mahi whakahaumanu a te tinana me te hinengaro i ia wāhanga:

• Wāhanga tuatahi: Ka kānewha te tangata, ka tīmata te pārore haere o te tinana me te ngū o te whakaaro.
• Wāhanga tuarua: Ka pōturi haere te hā me te kakapa manawa, ka tau te hurihuri o ngā whakaaro me ngā mahi a te hinengaro.
• Wāhanga tuatoru: Ka kīia tēnei wāhanga ko te moe rotu, he uaua te whakaoho i te tangata. He iti noa iho te mahi a te roro i te wā e moe rotu ana te tangata, engari he mea nui e piki ai tōna whakaaro pūrangiaho, tōna auahatanga me tōna pūmahara i te wā e oho ana ia.
• Wāhanga tuawhā: Ahakoa e kati ana ngā karu, e arowhaki ana i raro iho i ngā rewha. Ka piki haere te korikori o te roro engari ka tino ngū tonu ngā uaua. He mātuatua tēnei wāhanga o te huringa moe e pai ai ngā mahi hirikapo a te tangata i te wā e oho ana ia, tana ako, me tōna auahatanga. He moehewa, he moepapa rānei ka mātua puea ake i tēnei wāhanga.

Koia nei ētahi mate moe matua:

• Ko te moe whēuaua: He uaua te moe a te tangata, waihoki mēnā ka moe, he wā poto noa iho ka oho anō. Ko ngā take e moe whēuaua ai te tangata, ko tōna pōkaikaha, tōna kohuki, me ngā āhuatanga taiao pērā i te pāmahana hārukiruki, i te hoihoi, me te taratara o te moenga.
• Ko te moe hātū: I konei ka taupātia te arahau o te tangata nā te pārore o ngā uaua o te korokoro. Ka tū te hā mō tētahi wā, kātahi ka tīmata anō. Ko te ngongoro taikaha, ko te hāhā, ko te waha pūtī ētahi o ngā tohu o tēnei mate moe.
• Ko te mate waekori: Kāore e tau ngā waewae, ka kaha hiahia te tangata ki te whakakori i ōna waewae, me te aha he uaua tana warea e te moe.
• Ko te pōuruuru awatea: Ko te kaha warea o te tangata ki te hiamoe i te awatea. He mate ioio inā te hē o tā te roro whakamatua i te moe me te oho o te tangata.
• Ko te moepapa: He moehewa kino, he moehewa whakamataku, e hē ai te wairua o te tangata.