kuputuhi

WhakamĀrama Āpitihanga

Anei ētahi o ngā whakamahinga o te kuputuhi i te hangarau matihiko:

• Kōnae kuputuhi tāmore - he kupu anake e taea ana i tēnei momo papatono, karekau he pikitia, he whakarākeitanga, he hōputunga rānei o te kupu, pērā i te tāmiramira.
• Kōnae kuputuhi tāniko - he momo papatono tuhi kupu, e taea ana ētahi hōputunga o ngā kupu pērā i te tāmiramira, i te kōwhiri momotuhi me te whakauru tongi matā, engari kāore i rite ngā āheitanga ki ō te papatono tukatuka kupu.
• Pūtakatā kuputuhi - he papatono hei takatā i tētahi kōnae kuputuhi.
• Kuputuhi aunoa - i konei ka matapaehia e te papatono tukatuka kupu he aha te kupu e whakaurua ana. Ka puta aua kupu matapae hei whakaae atu mā te kaipato mēnā koirā tana hiahia. Ka kīia hoki tēnei ko te kuputuhi matapae.
• Rerenga kuputuhi - he mahi tēnei nā te papatono tukatuka kupu ki te heke iho ki tētahi rārangi kupu hou ina oti ana tētahi rārangi. Ko te tākai kuputuhi tētahi atu kupu e rite ana.
• Ko te kuputuhi puriwāhi - he kupu ēnei ka whakaurua hei whakakī noa iho i tētahi rohe i te tuhinga mō tētahi wā poto kia kitea ai pea te takoto o te whārangi.

Ko ngā wāhi i tētahi tāhono kaiwhakamahi e whakaurua ai he raraunga, ka kīia he āpure. He taitapa huri amio i te āpure, ā, ka tuhi te tangata i āna whakaurunga ki reira. He āpure te pouaka kuputuhi me te rohe kuputuhi:

• Pouaka kuputuhi - he pouaka hei tuhi mā te tangata i āna kupu. Ka whakamahia he pouaka kuputuhi i roto i te kawa takiuru, arā, hei tuhi mā te tangata i tana ingoa kaiwhakamahi me tana kupuhuna. Kotahi anake te rārangi kupu e taea ana, ā, e herea ana te maha o ngā pūtohu.
• Rohe kuputuhi - he rite ki te pouaka tuhi engari he maha ngā rārangi kupu e taea ana.