kai parakore

WhakamĀrama Āpitihanga

Ko tētahi whāinga nui o te hunga whakatipu i te kai parakore, ko te āta tiaki i a Papatūānuku, kia toitū ai tā rātou whakatipu kai. Mā te tiaki i ngā rauropi māori o roto i te oneone e haumako ai ō rātou whenua. Ka whai hoki rātou kia taioraora te kai, ka kīia he kai taiora nui. Ka tohea ngā huanga taiora o te kai parakore e te hunga hāpai i tēnei kaupapa. Ko te kai atua tētahi atu kupu e whakamahia ana mō te kai parakore, arā, he kai horomata, he nui ngā taiora o roto.

Ko te nuinga o ngā kai e hokona ana i ngā hokomaha, he mea whakatipu i ngā pāmu matarahi, māra matarahi, ka kīia he ahuwhenua matarahi, he ahumāra matarahi rānei. Ka whāngaihia te oneone me ngā tipu ki te whakahaumako horihori kia makuru tonu ai, kia makuru tonu ai i ia kaupeka tipu.

Ko te tupukāinga te tauaro o te ahuwhenua matarahi, arā, mā te whānau tonu e whakatipu ā rātou ake kai i te kāinga, ā, mā reira e taea ngā matū tāoke te kaupare, kia whāngaihia ai te whānau ki te kai tupumāori, ki te kai parakore.

Ko Te Waka Kai Ora tētahi rōpū Māori kua roa nei e hāpai ana i te kai parakore, i te rangatiratanga o te kai me te manawaroatanga o ngā hapori ki te whakatipu i ā rātou ake kai parakore. Ko rātou hoki te hunga e tiaki ana i te Hua Parakore, he tohu whaimana ka tukuna ki ngā pāmu me ngā māra e whai ana i ngā tikanga Māori ki te whakaputa kai parakore (www.tewakakaiora.co.nz).