inihua ~tia

WhakamĀrama Āpitihanga

Koia nei ētahi o ngā momo inihua:

• Ko te inihua whare. He inihua whakamaru i te tangata mēnā ka monemone noa tana whare, ka kino rānei tētahi wāhanga ōna. Ko te ahi, ko te waipuke, ko te rū whenua ētahi o ngā momo aituā ka taka ki te inihua whare. I ētahi kirimana inihua ka whakaaehia te mōrahi ka utua, ka kīia tērā ko te rahinga inihua. I ētahi kirimana ka whakaaehia kia hangaia houtia te whare kia rite ki te mea i monemone noa. Ka kīia tērā he kirimana utu whakakapi.
• Ko te inihua mataora. Ko tā te tangata he tuku i ana utu inihua ki te umanga inihua i te wā e ora ana ia. Ko te take, kia riro i ngā kaiwhiwhi painga ka whakaingoatia e ia tētahi tahua i tōna matenga.
• Ko te inihua tangihanga. He tahua ka riro i te whānau hei utu i te tangihanga ina mate te tangata nāna taua kirimana inihua.
• Ko te inihua waka. Hei whakamāmā i ngā whakararu ahumoni ina whānakohia te waka, ina pakaru rānei i tētahi hauata. Ko tētahi wāhanga o roto i te inihua waka ko te whakamaru i te tangata mēnā ka pakaru i a ia te waka, tētahi hautaonga, tētahi rawa rānei a tangata kē. Ka kīia tērā ko te inihua kiritoru.
• Ko te inihua taonga rōwhare. Hei whakamaru i te tangata mēnā ka whānakohia, ka kino, ka pakaru, ka ngaro rānei tētahi hautaonga o roto i te whare. Ka riro i te tangata te utu whakakapi, te wāriu mākete, tētahi ōrau rānei o te utu whakakapi. Kei ngā mokamoka o te kirimana inihua tēnei whakaritenga.

Ina hoko ana te tangata i te inihua, kei a ia te haepapa whāki ki te whakaatu i ngā āhuatanga katoa ka pā ki tā te umanga inihua whakatau ki te tuku kirimana inihua ki a ia.

Kei roto i te nuinga o ngā kirimana inihua tētahi whakaritenga e kīia ana ko te utu tūmua. Mā te tangata tonu e kawe te utu tūmua, mā te umanga e utu te toenga. He whakaritenga tēnei kia kore ai te tangata e tuku i te kerēme inihua tinihanga.

Arā hoki te hua tonokore o ētahi kirimana inihua, e mea ana ki te kore he tono ki taua kirimana rā i te takanga o te wā, ka heke haere te utuhoko inihua.