huamoni

WhakamĀrama Āpitihanga

Mēnā ka tukuna e te tangata he tahua moni hei pupuri mā te pēke mō tētahi wā, ka kīia tērā, ko te haumitanga tūmau. Ka riro i te tangata he huamoni mō tana haumitanga. Ko te tahua more hei ingoa mō te moni ka tukuna hei pūtea haumi. Hei tauira:

• Te huamoni tūpā:
  

  Ko te $450 te tahua more, ko te 5% te pāpātanga huamoni tūpā i ia tau. Hei tātai i te huamoni i te paunga o ngā tau e toru:

  $450 × 0.05 x 3 = $67.50

  Ko te $67.50 te huamoni i te paunga o te toru tau. Tāpiria tērā ki te tahua more ($450.00 + $67.50 = $517.50), ko te $517.50 te rahi o te pūtea i te paunga o te toru tau.

• Te huamoni whakaputu:
  

  Ko te $450 te tahua more, ko te 5% te pāpātanga huamoni whakaputu i ia tau. Hei tātai i te huamoni i te paunga o ngā tau e toru:

  Tau tuatahi: $450 × 0.05 = $22.50
  Ka tāpiria te huamoni ki te tahua more ($450 + 22.50 = $472.50). Kua eke ki te $472.50 te tapeke o te pūtea.

  Tau tuarua: $472.50 × 0.05 = $23.63
  Ka tāpiria te huamoni o te tau tuarua ($472.50 + $23.63 = $496.13). Kua eke ki te $496.13 te tapeke o te pūtea.

  Tau tuatoru: $496.13 × 0.05 = $24.81
  Ka tāpiria te huamoni o te tau tuatoru ($496.13 + $24.81 = $520.94). Kua eke ki te $520.94 te tapeke o te pūtea.

Ko te mōkete tētahi tauira o te moni taurewa ka tukuna e te pēke, ka minoa e te tangata hei hoko whare mōna. Mēnā he pāpātanga pūmau te huamoni ka utua e te tangata, kāore e rerekē haere te ōrau huamoni mō te roanga atu o te wā ka whakaritea e te pēke (pērā i te toru tau). Mēnā he pāpātanga taurangi, ka whakapikia, ka whakahekea rānei e te pēke, nā runga anō i ngā āhuatanga ohaoha o te wā.