WhakamĀrama Āpitihanga
Koia nei ētahi momo honohono rākau:
Ko te hono pihikete. Ka mahia he kapiti ki ngā rākau e rua e honoa ana hei whakanoho i tētahi porotiti ki roto, e kīia ana he 'pihikete'. Mā te pihikete e tīaroarotia ai ngā rākau e rua, e kaha ake ai hoki te mau o te kāpia:
Ko te hono karipapa. Ka honoa te pito o tētahi o ngā tūporo ki te mata o tētahi. Mā te tīwiri, mā te nēra, mā te kāpia e tina ai tēnei momo honohono, engari kāore i tino kaha:
Ko te hono tia. Ka wiria he kōhao ki ngā rākau e rua e honoa ana. Ka kuhuna he tia ki ēnei kōhao, mā reira e tīaroarotia ai ngā rākau e rua, e kaha ake ai hoki te mau o te kāpia:
Ko te hono matimati. Ka tāraia he matimati ki ngā rākau e rua e honoa ana, arā, he tuakahiwi, he whārua. Ka noho ngā tuakahiwi o tētahi rākau ki ngā whārua o tētahi. He pakari tēnei honohono:
Ko te hono awaawa. Ka mahia he awa ki tētahi o ngā rākau e honoa ana, hei nōhanga mō te rākau tuarua:
Ko te hono maeko. Hei hono whakahāngai i ngā pito o ētahi tūporo e rua. Ka noho kōtuitui ngā koure o tētahi papa ki ngā kokoru o tētahi. He honohono tino pakari tēnei:
Ko te hono inaki. Ka tāraihia he kou ki tētahi o ngā tūporo, he whārua ki tētahi. Ka whakanōhia te kou ki roto i te whārua:
Ko te hono hōtiu. Hei hono whakahāngai i ngā pito o ētahi tūporo e rua. E 45º te tapahanga o ia tūporo, ina honoa, e 90º te kokonga:
Ko te hono niao. Ka mahia he awaawa ki te tapa o tētahi o ngā tūporo e honoa ana hei nōhanga mō te tūporo tuarua:
Ko te hono puare-kou. Hei hono whakahāngai i ētahi tūporo e rua. Ka tapahia he kou ki te pito o tētahi, he puare hei nōhanga mō taua kou ki te tūporo tuarua:
Ko te hono awa-arero. Ka tapahia he awaawa ki te tapa roa o tētahi o ngā tūporo, he arero ki te tapa roa o tētahi. Ka noho te arero ki roto i te awa:
