hoko ~na ~nga

buy, sell, purchase, trade, barter, exchange

WHAKAMĀRAMA

He mahi kia riro mai, kia riro atu rānei he hautaonga, he ratonga rānei, kua utua ki te moni, ki te aha atu rānei.

The action to procure or disburse goods or services that have been paid for with money or by some other means.

Tauira KŌrero

E hia te utu hei hoko i tētahi rorohiko hou?

I kaha pakangatia te hokotanga atu o ngā whenua e mau tonu ana i te hapū.

I hokona e te kura tētahi waka hou hei kawe i ngā tamariki ki ngā kaupapa o roto i te hapori.

WhakamĀrama Āpitihanga

I ētahi wā ka tāpiria te 'mai' me te 'atu' hei tohu i te momo hoko, arā, mēnā ka riro atu, ka riro mai rānei te hautaonga, te ratonga rānei e hokona ana. He wā anō, mā te horopaki o te kōrero e tohu.

Ko tēnei mea te hoko tētahi āhuatanga matua o te ōhanga, e whai oranga ai te tangata me tōna whānau, te iwi, te hapori, otirā te whenua whānui. Ko tā te kaiwhakaputa, he hanga i tētahi hautaonga hei hoko atu māna ki tangata kē. Ka utua ki te moni, koirā hei whakatipu mā te kaiwhakaputa i tana pakihi, hei utu i ana kaimahi, hei oranga anō hoki mōna. Ko tā te kaiwhakarato he hoko atu i ana ratonga, i ana mahi, pērā i te horoi whare, i te whakatika huarahi, i te whakatū hui ahurei.

Ko tā te kaihoko, he hoko mai i ngā hautaonga, i ngā ratonga e matea nuitia ana, e hiahiatia ana rānei.

I te ao ohaoha ka kōrerohia tēnei mea te whakapetonga. Koia ko tā te tangata hoko hautaonga māna, hoko ratonga anō hoki. I roto i tētahi ōhanga, mēnā he kaha te whakapeto a te iwi, ka kaha anō te whakatū pakihi hei whakaputa hautaonga, hei tuku ratonga. Mā reira e nui ake ai ngā tūranga mahi, e nui ake ai te whiwhinga tāke a te kāwanatanga hei utu i ngā ratonga tūmatanui, pērā i te pūnaha hauora me te pūnaha mātauranga. Ka kīia he ōhanga tōnui.

E hia te utu hei hoko i tētahi rorohiko hou?

I kaha pakangatia te hokotanga atu o ngā whenua e mau tonu ana i te hapū.

I hokona e te kura tētahi waka hou hei kawe i ngā tamariki ki ngā kaupapa o roto i te hapori.