hauora niho

WhakamĀrama Āpitihanga

Ko te whāinga o te hauora niho, kia kaua te tangata e pākia ki te tunga niho me te tako pirau, kia tika hoki te tipu o ngā niho i te wā e tamariki ana, kia pakari tonu ai i te wā o te kaumātuatanga.

Koia nei ētahi kupu e hāngai ana ki te hauora niho:

• Ko te hohore niho. Ko te tāmate haere tērā o te kirimārō o ngā niho, ka ara ake pea i te hē o te taitai, i te rite tonu rānei o te ngau i te kai mārō.
• Ko te niho hawa. Koia ko te riwha o te niho ka hua ake i te ngaunga o tētahi mea mārō, i te tukitukia rānei e tētahi mea mārō.
• Ko te whēwhē niho. Ko te pokenga tēnei o te niho, o te tako rānei. I ētahi wā, ka hua ake he kōhao niho i te wāhi e pokea ana, ā, ko tā te rata niho he rongoā i te pokenga me te whakakī anō i te kōhao. Ko te koranu konuoi, ko te pia kiriaku ngā mea matua e whakamahia ana hei whakakī kōhao niho.
• Ko te kakati. Koia ko te āhua o te noho tahi o ngā niho o te kauae runga me ērā o te kauae raro ina kati ana te waha. Ki te kore e pai te kakati, tērā pea ka whakamaua e te mātanga niho he hanga whakatika niho. I te takanga o tētahi wā, pērā i te toru tau, ka tika haere te kakati, nāwai ā, ka tangohia atu taua hanga rā.
• Ko te kitokito. He ranunga o te maramara kai, o te hūware me te huakita, ka piri atu ki muri o ngā niho. Ki te kore e putuputu, ki te kore e tika te taitai ka totoka haere, nāwai ā, ka huri hei tātā, ā, ka riro mā te rata niho e waruwaru, ka kīia ko te waruwaru tātā.
• Ko te miro niho. He miro rauangi torokaha ka pānukunukuhia ki waenganui i ngā niho hei tīkaro atu i ngā toenga maramara kai e noho ana ki reira. Ko te miro niho me te taitai niho ngā mahi matua e ora pai ai ngā niho o te tangata. Ka kīia tērā mahi ko te akuaku niho.