WhakamĀrama Āpitihanga
Kua nui te horapa o te pōhēhē ki ngā hua pai o te hangarua, arā, mā te hangarua kāore e pērā rawa te tūkinotanga o te taiao. Engari ka nui kē atu te whakapau rawa, ka nui kē atu te puta o te para i runga i te pōhēhē o te tangata he pai noa iho nā te mea ka tukuna āna para ki te taupuni hangarua. He māminga nā te ao tauhokohoko kia haere tonu te hoko hautaonga. He nui tonu te parahanga ka puta i ngā pūnaha hangarua, he nui te whakapau pūngao, he nui hoki te para, ka mutu he nui te utu hei whakahaere. Koia rā e kīia ai e ētahi, he ara whakapōhēhē te hangarua hei whakaiti i te para.
Ko te huarahi e tino whaihua ana mō te ora o te taiao, ko te whakaiti i te hokohoko me te whakapeto, ko te whakamahi anō i ngā hautaonga, te tukurua rānei, me te whakatika i ngā hautaonga pakaru.
Arā ētahi rawa, ētahi matū kāore e hangaruatia ana i Aotearoa, pēnei i te kirihou-3 me te kirihou-7. Ka kīia ērā he hangarua-kore. Ina mutu te whakamahia, ka porowhiua ki te ruapara, ko te tāhawahawa i a Papatūānuku te otinga atu.
Ko te tohu hangarua tēnei:
Ko ētahi tikanga mō te tuku para hangarua ki te taupuni hangarua:
- Me āta kōmaka ngā para, ka waiho ai ki te taiaroa tika, pēnā he konganuku (maitai, konumohe), he kirihou, he pepa rānei.
- I te nuinga o ngā taupuni hangarua puta noa i te motu, ka whakaaetia te kirihou 1, te kirihou 2 me te kirihou 5, ko ērā momo kirihou anake.
- Me horoi kia parukore ngā para hangarua.
- Me wewete te hanga o ngā pouaka kārimārō kia takoto papatahi.
Hei tauira ēnei o ngā waha kei tētahi taupuni hangarua hei whāngai atu mā te marea i ā rātou para hangarua:
