awhikiri

WhakamĀrama Āpitihanga

Koia nei ētahi o ngā momo awhikiri:

• Te awhikiri taketake:
  Ko te awhikiri e noho ana ki ngā ira tuku iho o te tangata, mai i tōna whānautanga mai.
• Te awhikiri urutau:
  Ko te awhikiri ka hua ake i te urutaunga o te tinana ki ngā momo mate ka pāpā mai.
• Te awhikiri māori:
  Ko te āhei, ko te kaha o te tinana ki te kaupare atu i ngā tahumaero ka pāpā mai. I muri i te pākia o te tangata ki tētahi momo mate, pērā i te koroputa hei, ka tipu māori noa mai te awhikiri ki taua mate rā.
• Te awhikiri horihori:
  Ko te awhikiri ka hua ake i tētahi mahi, pērā i te wero rongoā āraimate.
• Te awhikiri taupoto:
  He poto noa iho te wā ka tau te awhikiri, pērā i te rua marama noa iho.
• Te awhikiri tauroa:
  He roa te wā ka tau te awhikiri, pērā i te rongoā āraimate mō te karawaka Tiamana. 

Ina horapa tētahi tahumaero pērā i te mate Korona-19, ka ākina te marea kia weroa ki te rongoā āraimate. Kia tino eke te tokomaha e whiwhi rongoā āraimate ana, kātahi ka haukotia te horapatanga o te mate. Ka kīia kua whai awhikiri paerahi taua hapori, taua taupori rānei, kua āhua haumaru. Mā te rongoā āraimate e whai awhikiri ai te tangata me te hapori. I ētahi momo mate, pērā i te Korona-19 ka kaha kē atu te awhikiri o te tangata ina weroa ia ki te āraimate turuki, e ono marama pea i muri i te weronga mātāmua. 

Mēnā e ngoikore ana te pūnaha awhikiri o te tangata, ka noho whakaraerae ia ki ngā momo mate ka tūpono noa mai. Ko te awhikiri pahara tērā, nā runga pea i tōna māruru, i tana kātū noho kimimate, he āhuatanga tuku iho rānei i tōna kāwai heke.