awhenga kai

WhakamĀrama Āpitihanga

Mai i te orokohanga o te waka rererangi me ngā momo rokiroki kai pērā i te whakatio, kua horapa haere te kawekawe kai, mai i tētahi wāhi ki tētahi, mai i tētahi whenua ki tētahi. Me te aha anō, kua tipu te hiahia ki ngā momo kai o tawhiti, o whenua kē. Nā konā i puta ai te māharahara o ētahi ki te awhenga kai me te tukutanga o te waro ki te kōhauhau, nā te tawhiti o te kawe i te kai mā runga wakarangi, waka moana, taraka rānei (arā, te tapuwae waro). Kua tahuri ētahi ki te hoko i ngā kai tuputata, ā, i reira te whakaranea o ngā puni kai tuputata ki ngā tāone maha o Aotearoa, arā, ko ngā mākete kaipāmu, mākete kaiwhakatipu ērā.

Ko te awhenga kai tētahi āhuatanga kua hua ake i te tauhokohoko huriao o te ahumahi kai, arā te rirohanga o te kai hei hautaonga hoko hei mahi moni mā ngā rangatōpū whenuarau. I tua atu i te nui whakaharahara o te awhenga kai (me te tukutanga o te waro) o tēnei pūnaha, kua tino memeha te rangatiratanga o te kai o te whānau, o te hapū, o te hapori. Koia rā ko te mana me te ringaoratanga ki te whakarato, ki te whiriwhiri i ā rātou ake kai taioraora. Kua noho kē hei pononga ki te hokomaha me te pūnaha tauhokohoko kai huriao.