WhakamĀrama Āpitihanga
Ko tētahi wāhanga matua o te arotahi, ko tōna puare, te wāhi e uru atu ai te aho. Ka taea te whakarahi, te whakaiti rānei i te puare. Ko te waepuare (f) hei tohu i te rahi o te puare, ā, he iti ake te puare 11 i te puare 2.8. He iti ake te aho ka uru atu ki te pū whakaahua mēnā ko te 11 te waepuare, i te aho ka uru atu mēnā ko te 2.8 te waepuare.
Ko te hua o te puare nui (waepuare iti), ka ngangahu ake ngā wāhanga katoa o te whakaahua, ahakoa tawhiti, ahakoa tata. Mēnā he iti te puare (waepuare nui), ka rehurehu haere ngā wāhanga tawhiti o te whakaahua. Ka kīia tēnei āhuatanga ko te rohe ngangahu.
Ko te whāroa o te arotahi, koia te tawhiti mai i te pū o te arotahi ki te haukotinga hihi, ki tua atu o te arotahi. He tawhiti te whāroa o te arotahi whakatata, koia hei hopu whakaahua o ngā mea tawhiti. He poto te whāroa o te arotahi whārahi.
He autaia te arotahi topa, inā e taea ana te whāroa o te arotahi te rāwekeweke kia rite ki te arotahi whārahi, kia rite rānei ki te arotahi whakatata, me ngā whāroa katoa ki waenganui. He arotahi topa tēnei:
Ko te kōpani tētahi atu wāhanga o te arotahi, ko tāna mahi, he tuku, he aukati rānei i te aho. Ko te wā e huaki ana te kōpani, ka kīia ko te huranga kōpani. Mā te huranga kōpani me te waepuare e tohu te rahi o te aho ka tau atu ki te paerongo o roto i te pū whakaahua. Mēnā he tere te huranga kōpani, ka pai tonu te hopu whakaahua o tētahi mea e neke ana. Mēnā he pōturi te huranga kōpani, kātahi nā te rehurehu o te mea nekeneke.
Ka whakamahia te arotahi piritata hei hopu whakaahua tiro tata, arā, kia kitea ngā wāhanga tino iti o tētahi mea, pērā i ngā kōpata wai ririki i te mata o tētahi rau:
Ko te karu ika tētahi atu momo arotahi, he tino whārahi. Arā, he tino tawhiti mai i tētahi pito o te whakaahua ki tētahi, ā, ka hakoko te whakaahua:
