aratuku (ako)

WhakamĀrama Āpitihanga

Koia nei ētahi momo aratuku ako:

• Ko te kanohi ki te kanohi. Koia nei te momo tuku iho kua roa e whāia ana i ō tātou kura, arā, ko te noho tahi mai o te kaiwhakaako me āna ākonga ki te wāhi kotahi.
• Ko te īako. He kupu whānui mō ngā ara ako ka whakamahi i te ipurangi. Ka kīia hoki ko te ako tuihono. Mā te paetukutuku, mā te īmēra, mā te huiata e tūhono atu ai te ākonga ki tēnei momo ako. Ka tukuna ngā rauemi, ngā akoranga, ngā tohutohu katoa ki a ia mā te ipurangi, waihoki he tuihono anō ngā whakawhitiwhiti kōrero ki tōna pouako me ōna hoa ākonga, tae atu anō hoki ki ngā aromatawai. Ka kīia te huihuinga o ngā ākonga i runga ipurangi, he akomanga mariko, he akomanga tuihono rānei.
• Ko te ako tukurua. I konei, ka noho ngā akoranga ki runga ipurangi, whatungaroto rānei, hei tiki ake mā te ākonga, hei tirotiro anō māna i te akoranga kua oti kē i mua. Ākene pea he ataata e whakaatu ana i te akoranga, ā, ka taea e te ākonga te hoki whakamuri, te āta haere hoki, kia tino ū ai te akoranga ki tōna hinengaro.
• Ko te ako tononoa. He āhua rite ki te ako tukurua, engari ehara i te tukurua i tētahi akoranga kua oti kē i mua. Ka tīkina ake e te ākonga ngā akoranga e hāngai ana ki a ia i te wā e pai ana ki a ia.
• Ko te ako hanumi. He wāhanga tuihono, he wāhanga kanohi ki te kanohi hoki kei tēnei momo aratuku.
• Ko te ako tāwariwari. He maha ngā aratuku ako i tētahi akoranga hei kōwhiri mā te ākonga i te mea e tino pai ana ki a ia me tōna tūāhua noho.
• Ko te ako ki tawhiti. Ka noho tawhiti te ākonga i tōna pouako. Ka tukuna ngā rauemi ako, ngā tohutohu, ngā whakawhitinga kōrero ki a ia mā ngā ara ipurangi, mā te poutāpeta rānei.
• Ko te ako matihiko. Ka tukuna ngā akoranga, ngā rauemi, ngā mahi ako mā te ipurangi, ā, ka mahi hoki te ākonga i āna mahi i runga rorohiko. Ka taea te ako matihiko i te akomanga tonu, i te kāinga, i wāhi kē rānei.