Mātauranga Whānui

akoranga ringarehe

trade training, vocational training, vocational course, vocational education

tūingoa

WHAKAMĀRAMA

He hōtaka ako, he kaupapa whakangungu rānei e whiwhi pūkenga ai, e whai mātauranga ai te ākonga, e hāngai ana ki tētahi momo mahi ā-ringa nei, pērā i te kāmura, i te kuti makawe, me te mahi tāpoi.

A learning programme or training scheme where students acquire the skills and knowledge pertinent to particular manual vocations such as carpentry, hairdressing and tourism.

Tauira KŌrero

E whakaaro ana taku tama ki te whai i tētahi akoranga ringarehe ā tērā tau.

Kua tino tahuri te kāwanatanga ki te whakatairanga i ngā akoranga ringarehe i ngā tau tata nei, nā runga i te tokoiti o te rāngaimahi hei whakatutuki i ngā mahi nui o roto i te ahumahi hanganui.

Ko ngā kuratini o te motu ngā whakahaere matua e tuku ana i ngā akoranga ringarehe.

WhakamĀrama Āpitihanga

I Aotearoa ko ngā whakahaere e tuku ana i ngā akoranga ringarehe, ko ngā kuratini o te motu (i raro i te maru o Te Pūkenga), ko ngā whakahaere whakangungu tūmataiti anō hoki. He pakihi ēnei whakahaere whakangungu tūmataiti e rēhita ana i raro i te maru o Te Mana Tohu Mātauranga o Aotearoa. Ka whakahāngaitia ā rātou akoranga ki ngā rōpū whaipānga, pērā i ngā ākonga tonu, i te hapori, i te ahumahi, i ngā kaituku mahi me ngā iwi.

Arā hoki ngā whakahaere whakangungu ahumahi. Ko tā ēnei whakahaere, he whakatau i ngā paerewa mō ngā akoranga ringarehe e hāngai ana ki tēnā ahumahi, ki tēnā ahumahi, he hāpai anō i ngā pia e ako ana i te mahi ringarehe i te wāhi mahi tonu.

I ētahi akoranga ringarehe me whai tohu uru te ākonga e whakaaehia ai tana whai i taua ara ringarehe. I te nuinga o te wā, ko te mātau reo matatini me te mātau pāngarau te matua o roto i taua tohu uru. He akoranga uru tōmua ka whakahaerehia e ētahi whareako, mā reira e whiwhi tohu uru ai te tangata. He wā anō, mā ngā wheako o mua o te tangata e whai urunga ai ia.

Ka whai wāhi atu ki te akoranga ringarehe: ko te ako i te mātauranga, i ngā ariā tūāpapa e hāngai ana ki te kaupapa o te mahi ringarehe; ko te ako pūkenga e hāngai ana ki te mahi ā-ringa nei; ko te ako anō i ngā pūkenga auāki; ā, i ētahi wā ko te ako i te mātauranga pakihi. Ka kīia te ākonga he pia, ā, ka hono atu ia ki tētahi kaituku mahi i ētahi rā o te wiki, ki reira whai pūkenga ā-ringa ai. Ko te taha ariā o tana kaupapa ka ākona i te whareako, i rā kē atu. Ka kīia tērā momo akoranga ringarehe, he mahi pia.

Ko te akoranga ringarehe te tīmatanga pea o te kāpeka aramahi o te tangata, inā tana hiahia ki te whai i tērā momo mahi mō tētahi wā āhua roa nei, ā, he mahi e pai ana ki a ia. Nō reira ka pai noa iho ki a ia tana whakapau werawera e whiwhi ai ia i ngā tohu mātauranga, i ngā tohu ringarehe e hāngai ana ki taua mahi rā.

Takenga Mai

ringa - hand

rehe - deft hand, expert

Tauira KŌrero

E whakaaro ana taku tama ki te whai i tētahi akoranga ringarehe ā tērā tau.

Kua tino tahuri te kāwanatanga ki te whakatairanga i ngā akoranga ringarehe i ngā tau tata nei, nā runga i te tokoiti o te rāngaimahi hei whakatutuki i ngā mahi nui o roto i te ahumahi hanganui.

Ko ngā kuratini o te motu ngā whakahaere matua e tuku ana i ngā akoranga ringarehe.

WhakamĀrama Āpitihanga