ākonga

WhakamĀrama Āpitihanga

Arā ētahi kaupapa ākonga whakawhiti, e haere ai tētahi ākonga o Aotearoa ki tētahi kura, whare wānanga rānei i tāwāhi mō tētahi wā, ka whakawhiti mai rānei he ākonga o whenua kē ki tētahi kura i Aotearoa, ki konei ako ai.

Ko te ākonga rāwaho, he ākonga ka haere mai i whenua kē, ā, ka utu ia i tana whai i te mātauranga i tētahi kura, i tētahi whare wānanga rānei i Aotearoa. Ko te ākonga rāroto te tauaro, arā, he ākonga nō Aotearoa ake. Karekau he utu mō te ākonga rāroto i tētahi kura tūmatanui i Aotearoa, ā, he iti ake tana utu mō te ako i tētahi whare wānanga i tā te ākonga rāwaho utu.

Mēnā e whai mātauranga ana te ākonga i ētahi whareako e rua i te wā kotahi, ka kīia ia he ākonga urungarua. Ākene pea he ākonga o te wharekura e whai ana i tētahi akoranga kotahi i te whare wānanga, i Te Aho o te Kura Pounamu rānei.

Ko te huarahi matua e tātaihia ai te rahi o te pūtea ka tukuna ki tētahi whareako tūmatanui o Aotearoa, ko te maha o āna ākonga ukiuki. Ko te waeine o taua pūnaha rā, ka kīia ko te tatauranga ākonga ukiuki. Mēnā e whai ana te ākonga i te 120 whiwhinga i Te Taura Here Tohu Mātauranga o Aotearoa, ka kīia ia he ākonga ukiuki. Hei tauira, mēnā e rua ngā ākonga harangotengote, he 0.4 te hōtaka ako o tētahi (e 48 whiwhinga), he 0.6 te hōtaka o tētahi (e 72 ngā whiwhinga), hui katoa ko te 1.0 tatauranga ākonga ukiuki ka riro i tō rāua kura.

I tua atu i tatauranga ākonga ukiuki, ko ngā momo tāpiritanga, pērā i te pūtea tauine tautika.