whakataetae whakaari tene

WhakamĀrama Āpitihanga

E toru ngā āhuatanga ka mātua whakawāngia i te whakataetae whakaari tene. Ko te rere o te whakaari tene me te kawe anō i tōna paki; ko te ngahau o te whakaari; ko ngā pūkenga o ngā kiriwhakaari me te mahi tahi a te kapa.

He maha ngā momo kēmu ka whai wāhi atu ki te whakataetae whakaari tene. Koia nei ētahi:

• He mea kē: Ka tīkina tētahi taputapu (pērā i te pene), ā, ka tauutuutu haere ngā kōrero mai i tētahi kapa ki tētahi. Ko te tīmatanga kōrero a ia tangata, ko te “Ehara tēnei i te pēne, he ... kē”, me te whakaari anō i te mahi o taua mea kē (hei tauira, ehara i te pene, he tokotoko kē - me te whakaari i te whakamahinga o te tokotoko).
• Te mea kino rawa atu o te ao: Ka tauutuutu haere ngā kōrero mai i tētahi kapa ki tētahi. Ko ia tangata ka whakapuaki i tētahi āhuatanga kino rawa atu o te ao, pērā i te kōrero kino rawa atu ki te whakaputa i tētahi mārena, me te kōrero kino rawa atu ki te whakatairanga i tētahi ture hou o te motu.
• He aha tō mahi: Ka tauutuutu haere, mai i tētahi kapa ki tētahi. Ka tīmata te tangata tuatahi ki te mahi i tētahi mahi (pērā i te peke). Ka pātaihia ia e te tangata tuarua, "He aha tō mahi e kare?" Ko te whakautu a te tangata tuatahi, ko tētahi mahi rerekē rawa atu, pērā i te hanga whare. I konā, ka tīmata te tangata tuarua ki te whakaari i taua mahi (te hanga whare), ā, ka tukuna e te tangata tuatoru te pātai “He aha tō mahi e kare?” Ka pērā haere te kēmu, ā, ko ngā tino aronga ko te tere o te whakahoki me te pai o te whakaari i te mahi.
• He whakamārama: Ka kōwhiria tētahi taputapu, pērā i te waea pūkoro. Ka tauutuutu haere ngā kōrero a ngā kapa. Ka tīmata te tangata tuatahi ki te whakamārama i te taputapu. Ina pakia ngā ringaringa o te kaiwhakahaere, ka mutu ohorere i konā ana kōrero, ā, ka hīkina ake te rākau kōrero e te tangata tuarua, me te kawe tonu i te rerenga kōrero a te tangata tuatahi.
• Ko te whakatakune: Ka tukuna ki tētahi o te kapa tētahi kupu hei whakaari māna. Ko tā tana kapa he whiriwhiri i te kupu e whakaarihia ana.
• Ko te whakaari kare ā-roto: Ka tukuna matapōkere ki ia kapa tētahi kare ā-roto hei hanga whakaari mā rātou, me te tohu anō i te roa o te whakaari (pērā i te 30 hākona).
• Ko te whakaari i tētahi whakataukī: Ka tukuna matapōkere ki ia kapa tētahi whakataukī. Ko tā te kapa he whakaari i tētahi whakatinanatanga o taua whakataukī.