WhakamĀrama Āpitihanga
Ka whai wāhi atu te puoro me te kanikani ki ētahi momo whakaari, ka kīia he whakaari puoro.
Mēnā karekau he reo kōrero a ngā kiripuaki, ka kīia tērā he whakaari ngū. Ko ngā whāitaita o te kanohi me ngā nekeneke o te tinana hei kawe i te kaupapa.
Arā ētahi atu momo whakaari, koia nei ētahi:
- Ko te whakaari manga-tahi, arā kotahi anake te wāhanga o te whakaari mai i te tīmatanga ki te mutunga. He poto te nuinga o tēnei momo. Ahakoa kotahi te manga, he nui ake pea i te tahi ngā kāpeka, arā te huringa o te āhua o te atamira (hei tauira, mā te whakarerekē i ngā taputapu, mā te huri rānei i ngā whakaariari).
- Ko te whakaari pakipūmeka. Ka pūtakea mai tēnei momo i tētahi takunetanga pono. Ka pūmau tonu te ngako o te takunetanga pono me te tāpiri anō i ētahi whakanikoniko i tua atu i ngā āhuatanga pono, pērā i te whakawhitinga kōrero a ngā kiripuaki. I ētahi whakaari pakipūmeka he kaha te piri ki te takunetanga pono, i ētahi atu he āhua ngoikore te hononga.
- Ko te whakaari mariko, arā, ka whai wāhi mai ngā āhuatanga o te wāhi ngaro ki te whakaari, pērā i te kēhua me te patupaiarehe.
- Ko te whakaari pehapeha. I tēnei momo, ka whakamarohitia te āhua o ngā kiripuaki, ngā wairua me ngā kare ā-roto. Ko te puoro tētahi tikanga hei whakamarohi i ēnei āhuatanga o te whakaari pehapeha.