WhakamĀrama Āpitihanga
E toru ngā momo toka matua:
Ko te toka ngiha:
Ka takea mai i te tokarewa ka puta i tētahi puia. Ka tere mātao te tokarewa, ā, ka hua mai he toka matarehu pērā i te ōnewa, te tokapata, te kōkawa me te tūhua. He mārō, ā, ka papare anō i te tukanga ngawhere. Ko ngā momo toka ngiha pērā i te ōnewa me te kōkawa ngā mea pai hei mahi hāngi:
Ko te toka parataiao:
Ka hua mai i ngā parataiao e kawea ana i te wai, i te hau rānei. Ka whakaputu haere he paparanga parataiao hou i roto i te takanga o te wā roa, ā, mā te kaha tonu o te pēhanga ka hua mai ai he toka. Ko te hōanga, te tokaparu me te pākeho ētahi o ngā momo toka parataiao. Ka whakamahia hei whakakoi i te mata o ngā taputapu, pērā i te whao, te toki me te māripi. Ko te hōanga utoka te toka hōanga he tino mārō nei te hanga. Ka whakamahia hei hanga toki. Ko te toka māhurehure tētahi momo toka parataiao, he matanui te āhua:
Ko te toka kāhuarau:
Ko te momo toka ka hua mai ina huri te hanga me te āhua o tētahi atu o ngā toka mā te pā mai o te wera me te pēhanga i roto i te takanga o te wā roa. Hei tauira, ka huri te pākeho hei māpara. He tino mārō te toka kāhuarau, hei tauira, ko te māpara me te kurupaku:
I te takanga o te hia miriona tau, ka hangaia he toka hou, ā, ka ngawhere anō he toka hei oneone. Ka kīia ko te hurihanga toka tēnei tukanga:
