pūngao

WhakamĀrama Āpitihanga

E rua ngā whakarōpūtanga matua o te pūngao, ko te pūngao oho me te pūngao moe. E kitea ana, e rangona ana rānei te mahi a te pūngao oho, arā, he momo korikori. Ka noho ngū te pūngao moe ki roto i tētahi mea, pērā i te pūngao o roto i te waro koranehe. Kia tahuna, kātahi ka oho te pūngao, ka huri hei pūngao pōkākā.

Kei roto i ēnei rōpū e rua ngā momo pūngao e mōhiotia ana:

Pūngao oho	Pūngao moe
pūngao hiko Ka puta tēnei momo pūngao i te rere o te irahiko i roto i te pūkawe hiko.	pūngao karihi E puritia ana te pūngao ki roto i te karihi o tētahi ngota. He nui te pūngao ka puta ina wehewehea te karihi (ka kīia ko te wehekarihi), ina honohonoa rānei he karihi (ka kīia ko te honokarihi).
pūngao neke Ko te pūngao kei roto i ngā mea katoa e korikori ana. Ko te papatipu me te tere o te mea ngā āhuatanga ka whakatau i te rahi o te pūngao neke. He rahi ake te pūngao neke o te motukā nui, tērā i te motukā iti mēnā he ōrite te tere o tēnā me tēnā:	pūngao matū E puritia ana tēnei momo pūngao i roto i ngā honohono matū o roto i ngā momo kai, i ngā momo kora, i ngā pūhiko me ngā pahū ahi.
pūngao ngāwhā Ko te pūngao ka puta ake i te koropupū o te tokarewa i roto rā anō i a Papatūānuku. Ka puta i ngā momo ngāwhā me ngā puia.	pūngao tō ā-papa Kei roto tēnei momo pūngao i ngā mea kei runga ake i te mata o te whenua. Ko te tō a Papatūānuku kei te pāpā atu ki ēnei mea, ā, ko te papatipu me te teitei o te mea ngā āhuatanga ka whakatau i te rahi o te tō. Ina taka, ina tukuna rānei te mea, ka hurihia hei pūngao neke. Hei tauira, he rahi ake te pūngao tō ā-papa o Hēmi i tō Roimata nā te mea he teitei ake ia.
pūngao hihi Mā te ngaru autōhiko e kawea ai tēnei momo pūngao. Hei tauira, ko te pūngao kōmaru, te pūngao aho, te pūngao pōkākā me te ngaru irirangi. Kei te takiwā o te 300,000 manomita i te hākona te tere o ēnei momo ngaru.	pūngao autō Ko te momo pūngao ka puritia ki roto i tētahi whaitua autō. Ka whai pūngao autō moe tētahi mea rino ina puritia ki roto whaitua autō. Ina tukuna te mea rino, ka hurihia te pūngao autō hei pūngao neke.
pūngao oro Ka takea mai te pūngao oro i te tōiriiri. Mā te ngaru anō e kawea ai te pūngao oro, engari he pōturi ake i te ngaru pūngao hihi. E 330 mita i te hākona te tere.	pūngao kūtorotoro Ko te pūngao kei roto i ngā mea kua kumea ake, kua pēhia rānei ki roto. Ka tukuna te pūngao ina tukuna te mea ki te hoki anō ki tōna āhua i mua. Hei tauira, ko te kukume i te hererapa, i te pūniko rānei.
pūngao pōkākā Ka puta tēnei momo pūngao i a Tamanuiterā, i ngā momo rama, i te ahi me ngā tauhohe matū. Ko tā te pūngao nei he whakakorikori i ngā korakora o roto i tētahi mea, kia wera ai.