WhakamĀrama Āpitihanga
E toru ngā tūāhua o te puia:
- Ko te puia korehāhā:
E kore tēnei puia e hū ake anō. Kua kore te koropupū o te tokarewa i roto i te puia. Hei tauira, ko ngā puia o Ōtautahi me Ōtepoti. - Ko te puia moe:
Kāore i te hū i tēnei wā, engari tērā pea, ka hū ake anō ā tōna wā. Hei tauira, ko Taranaki me ngā puia o Tāmaki-makau-rau. - Ko te puia oho:
E oho ana tēnei puia, e koropupū ana te tokarewa i roto i a ia, ā, e hū ake ana i ētahi wā. Hei tauira, ko Ruapehu me Whakaari.
He rerekē te āhua o ngā puia. Koia nei ngā āhua matua:
 | Ko te puia pākai: He mea hanga tēnei puia i te āta hū ake me te rere o te tahepuia i te mata o te whenua. Kāore e tino poupou ngā tahataha. Hei tauira, ko te moutere o Tūhua. |
 | Ko te tawhā: He porowhita te āhua o te rua nui ka puta i te ngahorotanga o te tihi o tēnei puia ki roto i te wāhi i noho ai te tokarewa i mua i te hūnga. Hei tauira, ko Rotorua me Taupō. Ko Aotearoa te whenua o te ao e tino kitea ana tēnei momo puia. |
 | Ko te puia koeko: He rahi ngā toka hou ka puta i te wāhi i hū ake ai te tokarewa ki waho. He paparanga pungarehu, he paparanga tahepuia te hanga. Hei tauira, ko Ngāuruhoe, ko Taranaki, ko Whakaari. Koia nei te momo puia e tino kitea ana puta noa i te ao. |
 | Ko te puia kōpuku: He poi haurua te āhua o te ahu ka puta i te tokarewa hāpiapia i te kōhao o te puia. Hei tauira, ko te moutere o Motutaiko i te moana o Taupō, ko Okataina. |