WhakamĀrama Āpitihanga
Koia nei ētahi o ngā momo pōtaka me ngā whakamārama (he mea tango ēnei whakamārama i te papakupu He Pātaka Kupu):
pōtaka huhū
He pōtaka porotaka te tinana, he koi tētahi pito, he pāraharaha te tumuaki, ka kōture mai he pihi i te tumuaki, ka takaia he miro ki te pihi kia huhū ai ina tāia.
pōtaka kōtore rua
He pōtaka koi ngā pito e rua.
pōtaka tā
He pōtaka porotaka te tinana, he koi tētahi pito, he pāraharaha te tumuaki, kia tāia ki te tā kua hurihuri.
Ko tētahi atu momo, ko te pōtaka hue. Ka weroa tētahi tīrou mā roto i te hue pokoruarua, he koi te pito whakararo o te tīrou e hurihuri ai te pōtaka i te papa. Ka kīia te tīrou, ko te papa tākiri o te pōtaka. Ka weroa hoki he kōhao i te taha o te hue, ina tāia, ka korowhiowhio.
Ka whakamahia he miro harakeke ki te takahurihuri i te pōtaka. Ka kīia tērā taputapu, he tā. Ka tākaitia te pōtaka ki te tā, ā, ka hihiko te kukume, koirā hei hurihuri i te pōtaka. Kātahi ka tāia haerehia kia hurihuri tonu.
Ka whai wāhi atu te pōtaka ki ētahi whakataetae. Hei tauira o ētahi:
- Ka whakapekea ngā pōtaka ki runga ake i ētahi toropuke, ka kīia he karangi.
- Ka tāia ngā pōtaka ki ētahi ara whāiti, i ētahi wā ka eke pea ki te 100m te roa. Ko te mea tuatahi, kia tae ki te pito whakamutunga, ko ia te toa. I ētahi whakataetae, ka whakaaehia te whakararu a tētahi i te pōtaka a tētahi atu.
- Ka tāia e te tokorua ā rāua pōtaka ki roto i tētahi rohe porowhita, me te whai kia āia atu te pōtaka a te hoariri ki waho i te porowhita.