WhakamĀrama Āpitihanga
Hei whakamārama i ngā momo tuhinga matua:
Ko te tuhinga whakamārama:
Ko te nuinga o ngā tuhinga ā-kura ka taka ki tēnei momo, ā, ko te tino whāinga ko te whakamārama, ko te whakaputa whakaaro mō tētahi kaupapa, tae atu ki ngā kōrero taunaki, ngā taipitopito. Ko te tuhinga tohutohu ka taka ki tēnei momo, arā, ko te whakamārama i tētahi mahi hei tārua mā te kaipānui. Ka āta raupapahia ngā wāhanga iti o roto i te tukanga mahi.
Ko te tuhinga paki:
Ko te whāinga o te nuinga o tēnei momo, ko te whakangahau, inā he kōrero ka puta i te puna auaha o te kaituhi. I tēnei momo ka kitea te tohungatanga o te kaituhi ki te whakaahua i te takiwā o te paki, me ōna kiripuaki. He tāhū tō te tuhinga paki, koirā ngā mahi matua ka hua ake i roto i te roanga atu o te paki. Ko te nuinga o ngā tuhinga paki kāore i pono.
Ko te tuhinga whakaahua:
Ko tā tēnei momo, he hanga whakaahua ki roto i te hinengaro o te kaipānui mō tētahi wāhi, mō tētahi mahi, mō tētahi hanga, mō tētahi tangata rānei. Arā kē ngā nuka reo ka whakamahia i te tuhinga whakaahua, pērā i te huahuatau me te kupu whakarite, e rangatira ai te reo, e pārekareka ai, e ariari ai te whakaahua ka hangaia ki te hinengaro o te kaipānui.
Ko te tuhinga whakawhere:
Ko te whāinga a te kaituhi o tēnei momo, ko te whakaaweawe i ngā whakaaro o te kaipānui kia rata mai, kia whakaae mai ia ki tētahi whakaaro, ki tētahi kaupapa, ki tētahi āhuatanga rānei. He nahanaha tēnei momo tuhinga, arā, ka āta raupapahia ngā tautohenga me ngā kōrero taunaki.