WhakamĀrama Āpitihanga
E rima, nui ake ngā mahinga o roto i te kōruru. Ka kīia te mahinga tuatahi ko te koropū, koia nei te whakamārama:
- Ka whakatakotoria ētahi kōhatu e whā ki ngā kokonga o tētahi tapawhā rite, ā, ka tāia he porowhiti ki waenganui:
- Ka puritia te kōhatu tuarima ki te ringa. E ai ki ētahi, ko te ‘hai’ hei ingoa mō tēnei kōhatu – koia te kōhatu mātāmua. Ka whiua whakarunga te hai, ā, mā taua ringa tonu e tere nuku te kōhatu tuatahi ki te porowhita, me te hopu anō i te hai i mua i te taunga ki te papa.
- Ka pērā anō i ērā atu o ngā kōhatu.
- Ko te mahi whakamutunga, he whiu whakarunga anō i te hai, ā, mā taua ringa tonu e tere kapo ngā kōhatu e whā e noho tōpū ana ki te porowhita, me te hopu anō i te hai i mua i te taunga ki te papa.
Ka kīia tētahi atu mahinga kōruru, ko te huripapa. I te huripapa, ka whiua whakarunga ngā kōhatu e rima, ā, ka hopukina ki te angaangamate o te ringa. Mēnā ka taka ētahi, ka whiua anō tētahi o ngā kōhatu i hopukina, ā, ka kapohia ērā i taka, me te hopu anō i te kōhatu i whiua i mua i te taunga ki te papa.
Arā ētahi atu mahinga kōruru, ā, he rerekē ētahi a tēnā iwi, a tēnā iwi. Koia nei ētahi a Ngāi Tahu:
- Ko te ‘paka’ (panga). Ka whiua te hai, ka kapohia takiruatia ērā atu o ngā kōhatu e whā, me te hopu anō i te hai.
- Ko te ‘takitoru’. Ka whiua te hai, ka kapohia ētahi kōhatu e toru, me te hopu anō i te hai.
- Ko te ‘takiwhā’. Ka whiua te hai, ka kapohia ērā atu o ngā kōhatu e whā, me te hopu anō i te hai.
- Ko te ‘rāraki’ (rārangi). He rite ki te koropū o runga ake nei.
- Ko te ‘piu’. Ka puritia ngā kōhatu e rima ki te ringa. Ka whiua tētahi, ka whakatakotoria ērā atu o ngā kōhatu e whā ki te papa, me te hopu anō i te kōhatu i whiua.
- Ko te ‘huri’. He rite ki te huripapa o runga ake nei.
- Ko te ‘kōruru’. Koia te mahinga whakamutunga. Ka puritia ētahi kōhatu e whā ki te ringa, ko tētahi ki te papa. Ka whiua whakarunga ngā kōhatu e whā, ka tere kapohia te kōhatu kei te papa, me te hopu anō i ngā kōhatu e whā i whiua.
