Ko tēhea kātū te puni takitoru nei, a Taku Ohooho?
He rerekē ngā kātū pukapuka kei ia wehenga o te whare pukapuka.
Koia nei ētahi o ngā kātū e kitea nuitia ana i ō tātou whare pukapuka:
| paki mātātoa | He waewae kai kapua ngā kiripuaki, he wana, he ihiihi te tāhū o te paki. |
| haurongo | He kātū pono. He kōrero mō tētahi tangata me āna mahi. Mēnā i tuhia e taua tangata tonu, ka kīia he haukiri. |
| pakitūroa | He pukapuka kua roa e pānuihia ana, e minamina tonutia ana i te takanga o ngā whakatipuranga. Ko te kohinga pakipoto nā Witi Ihimaera Pounamu Pounamu hei tauira. |
| paki pohewa | Ko ngā paki ka whai wāhi mai te ao ki tua, te ao mariko, pērā i te patupaiarehe me te taipō. |
| pakimaero waituhi | He paki kua tuhia hei pakiwaituhi, arā, he raupapatanga pikitia hei kawe i te tāhū o te paki, ā, ka tuhia ngā kupu o te paki hei whakapūaho, hei poihau kōrero, poihau whakaaro rānei. |
| paki whakawehi | Ko tā tēnei kātū paki, he whakatō i te mataku, i te pāwerawera me te maruwehi ki roto i te hinengaro o te kaipānui, o te kaimātakitaki. |
| paki pukuhohe | Ko tā tēnei, he whakakata, he whakangahau i te kaipānui, i te kaimātakitaki rānei, i runga anō i te māmā, i te kōrori, i te pūhohe, i te hākiki rānei o te paki. |
| pūrākau | He kōrero tuku iho nō te ao o nehe e mōhio whānuitia ana, he kōrero atua, he kōrero e whakaahua ana i te pūtakenga mai o ngā momo mea katoa ki te ao.* |
| pukatara | He pukapuka e kawe ana i ngā kōrero meka e pā ana ki tētahi kaupapa. Kāore pea te pukatara e pānuihia katoatia, engari ka tirohia hei kimi i ngā kōrero e hiahiatia ana. Ko te papakupu, ko te mātāpunenga hei tauira o te pukatara. |
| paki pohewa pūtaiao | He kātū paki e toro ana ki te ao o anamata, ki tuarangi, me ngā āheinga hou, ngā hangarau hou, ngā kitenga hou o reira. |
| paki whaiāipo | Ko te aroha o tētahi ki tētahi te matua o te tāhū o tēnei kātū paki. |
| paki taihara | He paki e takea mai ana i te taihara, arā, te takahi a te kiripuaki i te ture, me tā te ture whai, hāmene anō i a ia. |
| paki pohopā | Ko tā tēnei kātū paki, he whakapiki i te poho tārewa, i te hiamo, i te auwhi me te ohomauri o te kaipānui. |
| paki aronehe | Ko mua te takiwā o tēnei kātū paki. Ko ētahi paki aronehe me ōna kiripuaki, e kaha ana te hono ki tētahi kaupapa tūturu, ko ētahi kāore i tino kaha. |
| paki karihika | Ko te taera, te mate kanehe o tētahi ki tētahi, te tūāpapa o tēnei kātū paki. He pūkare, he wana te taki i te tauonioni ka hua ake i roto i te paki. |
| paki porehu | He āhuatanga noho huna i tēnei kātū paki, tae rā anō ki te mutunga, kātahi ka whākina taua āhuatanga huna. I ētahi, ko te kiripuaki hara ā-ture |
| kōrero tara (pakikīrehe rānei) | He akoranga matatika kei roto i te kōrero tara hei whakaaroaro mā te kaipānui. He poto te kōrero tara, ā, i te nuinga o te wā he kararehe ngā kiripuaki. |
I tua atu i ngā kātū i runga ake nei, koia nei ētahi atu momo pukapuka e hāngai ana ki te hunga tamariki:
| puka whakaahua | Ko ngā pikitia te mea matua o tēnei momo hei kawe i te paki, hei whakapoapoa i te kaipānui. |
| puka whai wāhanga | He paki kua wehea ki ētahi wāhanga motuhake, e whai ana tētahi i tētahi. E hāngai ana ki te hunga waenga, hunga taiohi, he kaipānui motuhake. Ko Mihiroa, nā Peti Nohotima, hei tauira. |
| puka huarite | He paki, he rotarota rānei, he pao kōhungahunga, ko te huarite me te ungeri ōna āhuatanga matua. |
| puka ariā | He pukapuka whakaatu i tētahi kaupapa, pērā i te waka me ōna momo, i te manaaki tangata, i te kararehe hei mōkai. |
| puka ako pānui | He pukapuka i tuhia hei whakaako i te tamaiti ki te pānui. He whāiti pea ōna kupu, he poto ngā rerenga kōrero. |
| puka mārangaranga | Ina huakina ngā whārangi o tēnei momo pukapuka, ka maranga ki runga tētahi wāhanga o te pikitia. He wāhanga rānei kei tēnei pukapuka hei rāwekeweke mā te tamaiti. |
*He Pātaka Kupu, Te Taura Whiri i te Reo Māori, nā Raupō i whakaputa (wh.718).
momo
Kua rārangihia ngā pukapuka o te kura i runga anō i ngā karangatanga kātū.
Ko tēhea kātū te puni takitoru nei, a Taku Ohooho?
He rerekē ngā kātū pukapuka kei ia wehenga o te whare pukapuka.