WhakamĀrama Āpitihanga
Me pēnei te whakahua i tētahi hautanga ā-ira: 0.593 – ‘kore ira rima iwa toru’. Kāore e tika ana kia pēnei te whakahua: ‘kore ira rima rau iwa tekau mā toru’. Kāore te ‘5’ e tohu ana i te 500, kāore hoki te ‘9’ e tohu ana i te 90. Nō reira, kia motuhake te whakahua i ia mati o roto i tētahi hautanga ā-ira.
I te hautanga ā-ira nei: 0.348
- e tohu ana te 3 i te 3/10 ,
- e tohu ana te 4 i te 4/100 ,
- e tohu ana te 8 i te 8/1000 .
Ko te papa hautekau, te papa haurau me te papa haumano ētahi momo whakaaturanga i te hautau ā-ira:
| He tapawhā hāngai kua wāwāhia hei whakaatu i ngā hautekau. Tekau ngā wehenga iti ōrite. Ko te 0.6 te hautau ā-ira e whakaaturia ana ki tēnei papa hautekau, arā, ko te 6/10 . |
| He tapawhā hāngai kua wāwāhia hei whakaatu i ngā haurau. Kotahi rau ngā wehenga iti ōrite. Ko te 0.28 te hautau ā-ira e whakaaturia ana ki tēnei papa haurau, arā, ko te 28/100 . |
| He tapawhā hāngai kua wāwāhia hei whakaatu i ngā haumano. Kotahi mano ngā wehenga iti ōrite. Ko te 0.742 te hautau ā-ira e whakaaturia ana ki tēnei papa haumano, arā, ko te 742/1000 . |
